Garry Conille Vizite Lopital Bernard Mevs pou Sipòte Polisye Blese yo.

Premye Minis Garry Conille akonpaye ak Direktè Jeneral Polis Nasyonal Dayiti, Normil Rameau, vizite lopital Bernard Mevs vandredi ki te 9 dawout la pou evalye kondisyon swen yo bay polisye ayisyen ki blese pandan yo t ap fè travay yo. Objektif vizit sa a te asire polisye yo resevwa swen apwopriye daprè estati yo.

Nan kominike Biwo Primati a, Premye Minis la te afime ankò angajman li pou ranfòse sèvis asirans sante pou polisye ayisyen yo. Li te pwofite okazyon sila a pou vizite polisye ki entène nan lopital la, epi verifye kalite tretman yo resevwa.

Premye Minis Conille te eksprime satisfaksyon li pou nivo swen yo bay polisye yo ak fanmi yo, epi li te remèsye tout patnè k ap soutni Polis Nasyonal Ayiti a. Li ensiste sou nesesite pou amelyore swen ak sipò y ap bay polisye ki riske lavi yo chak jou pou pwoteje popilasyon an.