Dimanch 15 Desanm nan, Polis Nasyonal Ayiti (PNH) reyalize yon operasyon rapid ak estratejik ki evite yon gwo katastwòf nan Lopital Bernard Mevs, ki chita kò l nan Village Solidarité. Pandan entèvansyon an, plizyè bandi ame te tonbe apre echanj gwo kout zam ak fòs lòd yo. Atak sa a, ki te byen planifye, te vize destabilize sèvis lopital la pandan y ap eseye fòse responsab yo antre nan negosyasyon anba presyon.
Depi kèk mwa, yon kontenè te plase nan antre prensipal lopital la kòm yon zouti entimidasyon gwoup gang sa yo. ayè Dimanch 15 desanm nan, pandan operasyon lapolis la, kontenè a te retire, epi zòn nan te sekirize. PNH enstale yon pòs fiks andedan lopital la pou garanti sekirite pèsonèl medikal yo, pasyan yo, ak tout moun k ap sèvi nan enstitisyon an. Yon sous nan lopital la fè konnen prezans lapolis la gen pou objektif dekouraje nenpòt lòt tantativ agresyon.
Aksyon sa a fèt nan yon moman kote zak vyolans ap ogmante nan katye Dèlma ak zòn ki antoure yo, kote gang ame yo ap chèche enpoze lwa yo. Men, entèvansyon rapid PNH la pa sèlman sove enstitisyon an, men li voye yon mesaj fò kote enfrastrikti enpòtan yo pa dwe rete san pwoteksyon. Malgre resous limite yo, PNH montre detèminasyon li pou pwoteje sit enpòtan yo epi asire sekirite sitwayen yo.
Operasyon sa a pa sèlman anpeche yon trajedi, men li ranfòse tou lespwa popilasyon an nan yon moman kote Ayiti ap chèche estabilite. Avèk aksyon konkrè ak yon angajman solid, PNH la ap travay pou garanti yon anviwònman kote lavi ak sèvis esansyèl yo pa sou menas kontinyèl.
Comments