Lekòl Presbiteryal Père Antoine Adrien, ki chita nan twazyèm seksyon Sourcelles, komin Kenscoff, resevwa kle nouvo building li nan men Fondasyon Digicel, vandredi 27 septanm 2024 la. Travay konstriksyon sa a fè pati yon seri pwojè fondasyon an pou bati plis lekòl nan zòn kote nesesite edikasyon an pi kritik atravè 10 depatman peyi a.
Lekòl sa a, ki se 194yèm etablisman Fondasyon Digicel finanse depi kreyasyon li an 2007, benefisye kounye a kat (4) nouvo sal klas, yon biwo administratif, yon blòk sanitè, yon kuizin, yon depo, ansanm ak renovasyon sis (6) lòt sal klas. Travay sa yo, ki koute prèske 243,000 dola ameriken, se yon kontribisyon enpòtan pou amelyore kondisyon aprantisaj timoun nan kominote Kenscoff la.
Pandan seremoni inogirasyon an, paran ak responsab lekòl la te eksprime gwo rekonesans yo anvè Fondasyon Digicel pou travay li fè nan zòn nan. Yo te souliye wòl kle pwojè sa a nan devlopman edikatif ak sosyal kominote a. “Edikasyon se poto mitan yon peyi. Li ede timoun yo devlope kapasite yo, epi prepare yo pou yon lavni ki miyò,” se sa yon paran te di pandan evènman an.
Depi kreyasyon li, Fondasyon Digicel ap travay san pran souf pou amelyore sektè edikasyon an Ayiti. Misyon fondasyon an se bay timoun yo aksè a yon bon jan edikasyon, espesyalman nan zòn riral yo kote resous edikatif yo limite anpil. Depi 17 lane, fondasyon an deja bati plizyè douzèn lekòl nan kominote kote bezwen edikasyon an ap pèse.
Nouvo building sa a se dezyèm lekòl Fondasyon Digicel inogire pou ane 2024 la. Li reprezante yon lòt etap enpòtan nan angajman fondasyon an pou sipòte devlopman kominote yo epi kreye plis opòtinite edikasyonèl pou timoun yo. Responsab Fondasyon Digicel yo deklare yo pral kontinye inisyativ sa a nan ane kap vini yo, ak objektif pou ranfòse sistèm edikasyon an nan tout peyi a.
Comments