Pandan dènye lane sa yo, jistis popilè a ki layite kòl nan sosyete nou an depi kèk tan,ki pran fòm yon fenomèn ki pote non "Bwa Kale", pa sispann plase nan sant refleksyon popilasyon ayisyèn nan. Jou ki te madi 17 desanm nan, yon jèn gason ki fè trafik moto, ki rele Kendy pèdi lavi l nan Petite Rivière de l’Artibonite. Yo akize l kòmkwa li t a chofè pèsonèl Olwich, chèf gang ki kontwole mache piblik nan komin Crête-à-Pierrot a.
Dapre temwayaj kèk abitan, Olwich ap dirije yon rezo kriminèl byen òganize, nan mache kominal lan, kote manm ki nan gang nan fòse machann yo peye lajan pou gen aksè rantre nan mache a. Sitiyasyon sa a, k ap deranje depi plizyè mwa, mete popilasyon an nan yon kòlè atwòs ak dezespwa.
Dènye entèvansyon fòs sekirite yo nan zòn nan te bay espwa, men li ankouraje tou mouvman Bwa Kale a, yon fòm lajistis popilè kote abitan yo atake epi elimine moun yo sispèk ki nan aktivite kriminèl. Se nan mouvman sa a Kendy te tonbe, pandan li te akize kòm moun ki fasilite deplasman Olwich ak konplis li yo nan aktivite ilegal yo.
Malgre tout zak reprezay sa yo, otorite yo kontinye operasyon yo nan depatman Latibonit la. Objektif la se retabli lapè ak sekirite nan rejyon sa a, ki gen yon enpòtans estratejik epi ki sou kontwòl gang ak zam depi lontan.
Comments