Etazini Ranfose Sekirite Fwontyè Maritim yo Kont Migrasyon ilegal.

Nan yon deklarasyon, amiral Kevin Lunday, ki se komandè pwovizwa Gad Kòt Ameriken an, mete aksan sou wòl enpòtan ajans lan, kòm premye fòs pou fè respekte lwa maritim atravè mond lan. Gad Kòt la sèvi kòm poto mitan nan pwoteksyon fwontyè maritim, entegrite teritoryal, ak souverenite Etazini.

Pou anpeche migrasyon ilegal ak travèse danjere, Gad Kòt la ranfòse resous li yo. Yo mobilize bato patwouy, avyon siveyans maritim, ekip entèvansyon rapid, ak lòt enfrastrikti nan zòn estratejik, tankou:

•Fwontyè Sidès Etazini, pwòch Florid, pou kontwole migrasyon ki soti Ayiti ak Kiba.

•Fwontyè maritim bò Alaska, Hawaï, ak teritwa Pasifik yo.

•Zòn lanmè ant Bahamas ak Sid Florid.

•Lanmè Sidwès ki konekte Meksik ak Etazini nan Pasifik la.

•Gòlf Meksik ant Texas ak Meksik.

Deklarasyon amiral Lunday fè konnen:

“Ansanm ak Depatman Sekirite Enteryè ak Depatman Defans, n ap travay pou detekte, dekouraje, epi bloke migrasyon ilegal, trafik dwòg, ak lòt aktivite ilegal anvan yo rive sou fwontyè nou yo.”

Inisyativ sa a make yon etap kle nan estrateji Etazini pou jere sekirite maritim ak migrasyon nan yon kontèks global ki konplike.