Madi 12 novanm 2024, nan apremidi, yon atak vyolan te rache lavi Doktè Déborah Pierre, yon renome nan domèn iwoloji nan peyi a. Doktè Pierre te sibi plizyè bal devan klinik li nan ri Cameau, zòn Bas Peu de Chose, nan Pòtoprens. Malgre tout efò medikal, li pa t rive sove epi li te rann dènye souf li nan lopital, kote li kite kominote medikal la ak fanmi l, nan yon doulè ak chòk pwofon.
Pandan atak la, papa Doktè Pierre, ki te prezan nan moman trajedi a, te resevwa plizyè bal tou, men li te reyisi siviv, aktyèlman li anba swen entansif. Doktè Pierre te fè etid li nan fakilte medsin nan Inivèsite Notre Dame d’Ayiti, epi li te rete sèvi kominote a, malgre sitiyasyon sekirite ki pa sispann degrade. Asasinay sa a sou yon medsen k ap sèvi popilasyon an soulve anpil kòlè ak enkyetid, sitou paske Ayiti ap fè fas ak yon gwo mank espesyalis nan branch iwoloji.
Trajedi sa a vin mete plis aksan sou feblès sistèm sekirite Ayiti a, kote pwofesyonèl sante ak lòt travayè esansyèl yo ap viv nan gwo ensekirite. Asosyasyon medikal yo ak divès lòt òganizasyon leve vwa yo pou mande jistis pou Doktè Pierre epi pwoteksyon pou pwofesyonèl sante yo.
תגובות