Jodi Lendi 16 septanm 2024 la, Digicel pote plis esplikasyon sou pàn Kab ki pase anba lanmè ki sèvi pou founi sitou sèvis entènèt la, yo fè konnen difikilte pou jwenn sèvis entènèt,depi samdi 14 septanm nan, se koz gwo tansyon ki genyen ant responsab Kaliko Beach Club la ki entèdi yo gen aksè ak espas la pou al rezoud pwoblèm teknik sila a. Malgre yon entèvansyon rapid bò kote teknisyen yo, yo pa t kapab gen aksè nan zòn afekte a pou fè reparasyon nesesè yo.
Pou kontinye bay kliyan yo sèvis, Digicel anonse yo pral pran mezi tanporè pandan y ap tann yon solisyon final. Konpayi a rekonèt enpòtans kominikasyon pandan moman difisil sa yo epi deside kenbe sèvis esansyèl yo malgre difikilte ki prezante yo.
Anplis sa, Digicel reponn piblikman akizasyon Paret Hospitality Group S.A., ki te pibliye yon lèt piblikman pou akize konpayi an gen dèt.
Digicel fè konnen avidèy li pa gen okenn dèt pou enstitisyon sila a, pandan yo fè konnen gen yon aksyon jidisyè ki an diskisyon depi 2021, men ki poko jwenn yon rezolisyon tribinal.
Digicel kondane zak la, kote yo te anpeche yon sèvis piblik esansyèl fonksyone, sitou nan yon kontèks ensekiritè peyi a ap konnen. Anplis sa, yo te raple kab sa a sèvi plizyè lòt operatè nan peyi a ki afekte tou.
Digicel remèsye kliyan li yo, patnè li yo, ak laprès pou sipò yo pandan peryòd sila a, pandan yo tou deklare pousuit jidisyè yo swete fè pou pousuiv Fritz Emmanuel Paret, otè lèt difamatwa a, nan tribinal.
Comments