Death Clock: Yon Aplikasyon ki fè Prediksyon sou Dat Lanmò

Nan yon mond kote teknoloji ap pran tèt li, Death Clock, yon aplikasyon ki sèvi ak entèlijans atifisyèl, ap fè gwo tole. Ak yon pri 40 dola ameriken, aplikasyon sa a gentan fè plis pase 125,000 telechajman nan mwens pase sis (6) mwa.

Death Clock itilize plis pase 1200 etid syantifik pou analize enfòmasyon pèsonèl itilizatè yo, tankou rejim alimantè, kantite tan yo fè egzèsis, kantite èdtan yo dòmi, ak lòt abitid ki gen rapò ak vi prive yo. Lè l fin trete done sa yo, aplikasyon sila lanse yon "kontè-tan" (countdown timer) ki bay yon dat kote yo predi moun nan ap mouri.

Malgre popilarite li, aplikasyon an pa epanye gwo kritik. Gen moun ki di li itil pou ede reflechi sou fason moun viv lavi yo ak pran desizyon pou amelyore sante yo. Men, gen lòt ki gen enkyetid sou konsekans sikolojik li ka genyen, tankou kreye laperèz, depresyon, oubyen fè moun obsede ak dat yo predi a. Kèk ekspè fè remak tou sou posiblite pou enfòmasyon pèsonèl itilizatè yo t a itilize mal.

Malgre tout bagay, Death Clock sanble reprezante yon nouvo etap, kote teknoloji ap enfliyanse fason moun wè lavi ak lanmò. Se yon zouti ki entrige anpil moun, men li poze yon kesyon fondamantal: Èske ou pare pou konnen dat ou ka mouri?