Ayè mèkredi 1ye janvye 2025 lan, BRICS, ki gen ladan Brezil, Larisi, Lend, Lachin, ak Lafrik Sid, fè yon gwo avanse nan estrateji ekspansyon li yo, nan ajoute nèf nouvo peyi patnè. Depi kounye a, Byelorisi, Bolivi, Kiba, Endonezi, Kazakhstan, Malezi, Thailand, Ouganda, ak Ouzbekistan vin nouvo manm ki pral patisipe nan aktivite gwoup la, byenke yo pa gen dwa vote nan desizyon final yo.
Avèk elajisman sa a, BRICS reprezante 51% nan popilasyon mondyal la ak 41% nan PIB mondyal an tèm "pouvoir d'achats". Sa make yon etap enpòtan nan misyon yo pou rebati ekilib Jewopolitik mondyal la, ak pou konsolide koperasyon Sid-Sid kòm yon altènativ kont blòk tradisyonèl peyi oksidantal yo domine.
Depi 2024, peyi tankou Ejip, Etyopi, Iran, ak Emira Arab Ini te rantre nan gwoup la, BRICS t ap chèche reyalize objektif estratejik tankou : Batay kont chanjman klimatik, diminye povrete, amelyore aksè ak medikaman, epi ankouraje inisyativ ekonomik ak teknolojik.
Pou anpil obsèvatè, elajisman sa a se yon siy klè BRICS ap chèche kreye yon gouvènans mondyal ki pi reprezante enterè peyi ki sou wout devlopman yo. Ak nouvo manm yo, gwoup la louvri plis opòtinite pou kolaborasyon ekonomik ak Jewopolitik pandan li ranfòse enfliyans li sou sèn mondyal la. Yon etap ki montre aspirasyon pou yon mond ki pi ekitab.
Comments