Batonye Jacques Letang, yon avoka angaje ak yon defansè dwa moun te resevwa premye Pri CIB Batonye Stasi. Pri sa a, ki te kreye nan lonè Batonye Michel Stasi, se yon inisyativ ki vize onore avoka oswa òganizasyon ki fè gwo travay nan defann dwa moun ak lalwa nan diferan kote atravè monn nan.
Malerezman, Batonye Jacques Letang pa t ka vwayaje pou l te ale Fort-de-France kote seremoni an t ap fèt, akoz sitiyasyon difisil k ap brase bil peyi Ayiti. Nan okazyon ouvèti 38yèm Kongrè anyèl Konferans Entènasyonal Bawo(CIB), yo remèt pri a bay Batonye Stanley Gaston, prezidan onorè CIB la, ki te reprezante Jacques Letang pandan evènman an. Yon delegasyon avoka ki soti Ayiti te prezan pou temwaye moman enpòtan sa a.
CIB felisite ak tout kè travay ak devouman Jacques Letang, ki depi plizyè ane ap mennen yon gwo lit pou defann dwa moun ak jistis nan peyi Ayiti. Yo pran okazyon sa a pou salye kouraj ak rezistans tout avoka ayisyen yo, ki malgre ensekirite ak lòt defi yo ap fè fas yo, kontinye goumen pou fè respekte prensip jistis ak dwa moun nan peyi a.
Jacques Letang, ki se yon avoka depi 2004, se yon moun ki angaje nan anpil batay pou dwa moun. Li se fondatè ak prezidan Biwo Dwa Moun Ayiti (BDHH) depi 2015. Li te sèvi kòm Batonye nan Koto, epi li se prezidan Federasyon Baro Ayiti (FBH) depi 2020. Angajman l nan travay sa yo fè l tounen yon modèl nan sektè Jidisyè a, an Ayiti.
Pri sa a pa sèlman onore Jacques Letang, men li sèvi kòm yon siy rekonesans pou tout jefò kominote avoka ayisyen yo, nan yon moman ki gen anpil difikilte nan peyi a.
Comments