Nan yon rankont enpòtan, Minis Edikasyon Nasyonal Ayiti a, Antoine Augustin, ak anbasadè Lafrans an Ayiti, Patrick Michon, te diskite sou plizyè pwen koperasyon pou amelyore sektè edikasyon ayisyen an. Rankont sa a, ki pote anpil pwopozisyon konkrè, montre volonte Lafrans pou soutni yon sistèm edikatif solid ak dirab nan peyi a.
Minis Antoine Augustin te mete aksan sou priyorite ministè li an pou ane kap vini yo. Nan pwojè enpòtan yo, nou jwenn ranfòsman edikasyon preskolè ak amelyorasyon kalite ansèyman piblik nan tout peyi a. Yon lòt inisyativ enpòtan se ankouraje miltilingwis, kote lang matènèl, kreyòl, pral jwe yon wòl santral pou amelyore baz konesans timoun yo. Minis la anonse tou kat (4) nouvo matyè ap rantre nan pwogram premye sik la: edikasyon teknolojik, edikasyon estetik ak atistik, edikasyon fizik ak espò, ansanm ak edikasyon sou sitwayènte.
Ministè a genyen tou yon plan pou devlope sektè teknolojik la nan nivo segondè a, epi elaji pwogram kantin eskolè a pou bay plis elèv manje nan lekòl yo, yon pwojè ki atire atansyon patnè fransè yo.
Anbasadè Michon te afime ankò angajman Lafrans pou soutni Ayiti nan refòm sa yo. Nan yon tan ki p ap twò long, Lafrans planifye yon finansman plizyè milyon ero pou ranfòse kantin eskolè a pandan ane akademik 2024-2025 la. Sipò sa a gen ladan l ogmantasyon itilizasyon pwodui agrikòl lokal yo, nan manje eskolè yo, yon angajman ki an akò ak Deklarasyon Pari Kwasansman pou Alimantasyon Eskolè a.
Sou plan enfrastrikti, Lafrans anonse li pral ede pou rebati kèk lekòl piblik nan zòn metwopolitèn Pòtoprens, byenke yo poko site ki lekòl sa yo.
Diskisyon yo te tou mete anfaz sou enpòtans fòmasyon kontinyèl pou pwofesè yo ak revizyon pwogram ansèyman yo pou yo ka pi byen reponn a bezwen sosyete ayisyen an. Pami kad Ministè a ki te patisipe nan rankont sila a, te gen Jean-Robert Dossaint, direktè kabinè minis la, Miguel Fleurijean, direktè ansèyman segondè, Etienne Louisseul France, direktè depatman edikasyon lwès, ak Bertrand Ollivier, konseye politik nan anbasad Lafrans.
Akoz akò sa a, yon premye etap franchi pou amelyore sektè edikasyon an nan yon fason enklizif, solid ak rezistan pou jenerasyon kap vini yo.
Comments