Rezilta yon sondaj ki pibliye lendi 28 oktòb la revele yon batay sere ant kandida demokrat Kamala Harris ak ansyen prezidan Donald Trump. Sondaj la montre Harris ak 48% sipò kont 46.8% pou Trump, yon diferans de (2) pwen sèlman, sa ki demontre yon kous ekstrèman sere. Avèk yon diferans konsa, gen posibilite pou eleksyon an fini ak yon egalite, yon sitiyasyon ra men posib, ki ka pote gwo konsekans sou desizyon politik nan Kongrè ameriken an.
Lè gen yon egalite nan eleksyon prezidansyèl ameriken an, amandman 12 Konstitisyon Etazini an fè konnen se Kongrè ki gen manda pou fè chwa a. Nan senaryo sa a, Chanm Depite yo ap eli Prezidan an, tandiske Sena a ap chwazi Vis-Prezidan an. Si yon sitiyasyon konsa ta rive, avantaj politik la ka ale an favè Trump, akoz majorite repibliken nan Kongrè a. Sa t a ka kreye yon tandans kote yon kandida ka genyen menm si popilasyon an separe an de (2) sou chwa yo.
Avèk yon Kongrè kote Repibliken yo domine, sitiyasyon an t a kapab favorize yon Prezidan repibliken si eleksyon an ta rive nan pwen kote Kongrè a dwe pran desizyon an. Sena a, ki kontwole pa repibliken yo, t a gen kapasite pou chwazi vis-prezidan an, sa ki t a ka kreye yon rezilta kote pouvwa egzekitif la divize ant kandida soti nan pati diferan, yon sitiyasyon ki ra men ki t a ka konplike kowoperasyon politik.
Rezilta sondaj sa a montre klèman jan eleksyon prezidansyèl sa a enpòtan pou oryantasyon politik ak sosyal Etazini nan ane kap vini yo. Avèk sèlman kèk pwen ki separe kandida yo, eleksyon an rete etap ki pi desizif la, pandan popilasyon ameriken an ap tann pou wè si yo pral fè fas ak yon egzekitif divize oswa yon alyans sanzatann ki sòti nan desizyon Kongrè a.
Comments