AGD Fè yon Rekò nan Mwa Novanm 2024 la, Kote yo Kolekte plis pase 10 Milya goud malgre gwo Defi.

Nan yon kontèks difisil kote Ayiti ap fè fas ak ensekirite k ap vale teren, epi yon grèv ki paralize Direksyon Jeneral Taks yo (DGI), Administrasyon Jeneral Ladwàn (AGD) reyalize yon pèfòmans remakab. Nan mwa novanm 2024 la, AGD kolekte yon total 10,030,888,814 goud, sa ki reprezante 95% sib Ministè Ekonomi ak Finans (MEF) te fikse pou mwa a.

Rezilta sa yo rive malgre yon grèv pwolonje nan DGI, kote anplwaye yo ap reklame yon nouvo direktè jeneral, sa ki te mete anpil fren nan fonksyònman nòmal enstitisyon sa, ki se youn nan poto mitan finansman piblik peyi a. Malgre obstak sa yo, AGD montre kapasite l pou kenbe yon nivo koleksyon wo, ki vin siyifye kontribisyon enpòtan li nan ranfòse resèt leta.

Yon sous ki fyab, ki travay pou AGD fè konnen: "Rezilta sa yo montre menm nan yon anviwònman difisil, gen posiblite pou fè pwogrè." Pèfòmans sa vle di gen yon potansyèl reyèl pou ogmante kapasite finansman entèn peyi a. Si Ayiti kontinye sou menm chimen sa, sa ka louvri pòt pou plis pwojè piblik epi diminye bezwen peyi a genyen pou sipò finansye entènasyonal.

Otorite yo espere rezilta pozitif sa yo pral ankouraje plis jefò pou estabilize anviwònman sosyo-ekonomik la epi akselere refòm ki nesesè yo nan lòt enstitisyon piblik yo. AGD, avèk jefò sa, montre malgre defi, pwogrè ka fèt si gen angajman ak lidèchip solid.