Administrasyon Trump Pran Desizyon Pou Depòte Imigran Ki Rantre Sou Pwogram Biden Nan.

Administrasyon Trump lan fèk pran yon desizyon ki ka gen gwo konsekans sou anpil imigran, espesyalman sila yo ki te rantre legalman nan peyi Etazini, anba pwogram prezidansyèl Biden nan. Daprè yon memo "The New York Times" jwenn, chèf pwovizwa Depatman Sekirite Entèn nan siyen yon lòd ki bay ajan Imigrasyon ak Ladwàn (ICE),  pouvwa pou akselere depòtasyon moun ki te antre tanporèman sou pwogram sila.

Pami pwogram yo ki vize, gen aplikasyon CBP One, ki te pèmèt imigran pran randevou sou fwontyè ki separe Etazini ak Meksik, ansanm ak yon inisyativ imanitè ki te pèmèt moun ki t ap chape anba kriz nan peyi tankou Kiba, Nikaragwa, Venezyela, ak Ayiti, jwenn yon chans pou yo antre legalman nan peyi a.

Pou Ayisyen yo, desizyon sa a gen yon enpak dirèk sou yo, anpil nan yo ki te chape anba enstabilite politik, vyolans gang, ak difikilte ekonomik. Sa ka lakòz yon vag depòtasyon rapid, ki t a mete anpil fanmi an danje ak destabilize kominote yo.

Avoka pou dwa imigran yo fè konnen yo enkyete anpil akòz desizyon sa a, ki ka ogmante risk pou anpil fanmi pèdi pitit yo oswa lòt manm fanmi yo nan pwosesis depòtasyon sila.