Administrasyon Trump lan ogmante presyon sou I.C.E pou arete plis imigran.

Daprè Washington Post, Prezidan Donald Trump pase yon lòd sevè bay Immigration and Customs Enforcement (ICE) pou triple kantite imigran yo arete chak jou. Olye de 100 a 500, administrasyon an vle chif la rive nan 1,200 a 1,500 arestasyon pa jou.

Nan yon reyinyon ki fèt samdi 25 janvye 2025, ICE resevwa lòd pou chak biwo lokal ajans lan fè omwens 75 arestasyon chak jou. Sous jounal la fè konnen Trump pa satisfè ak rezilta kanpay depòtasyon yo jiskaprezan epi mande pou entansifye efò yo.

Plizyè fonksyonè, aktyèl ak ansyen, eksprime enkyetid yo sou risk pou taktik ajans lan vyole dwa imigran yo, pandan y ap eseye reyalize sib estrik sa a. Desizyon an soulve gwo kritik nan mitan kominote entènasyonal ak defansè dwa moun.