Centre d'Appui National (CAN) ap kontinye travay san pran souf pou pote sekou bay moun ki nan bezwen ijan yo. Dr Didier Hérold Louis, direktè jeneral CAN, fè konnen malgre tout difikilte yo, ekip la rete mobilize:
"Nou refize abandone misyon nou. Kat anbilans ak yon ekip restren toujou pare nan HUP pou reponn apèl ijans yo."
Nan entèvansyon sa yo, Yo rive bay swen:
7 moun blese pa bal,
5 viktim vyòl,
2 viktim batay,
fanm ansent nan kondisyon difisil,
epi lòt moun viktim aksidan sou wout.
Men, malgre entèvansyon sa yo, anplwaye CAN yo pa sispann fè fas ak gwo difikilte pou deplase ak antre nan lokal tankou Cité Militaire. Nan twa (3) semèn, yo te gen aksè vizite lokal sa a sèlman twa fwa.
Yon lòt defi grav ki vin konplike sitiyasyon an, se desizyon pou fèmen plizyè lopital nan Pòtoprens akoz menas gang yo. Selon Dr Louis:
"Jodi a, se prèske enposib pou jwenn yon lopital ki fonksyone, sof HUP ki kontinye akeyi moun ki nan detrès."
Malgre tout obstak sa yo, CAN kenbe detèminasyon pou reponn apèl moun ki nan bezwen yo. Men presyon sante ak ensekirite mete enstitisyon an nan yon pozisyon difisil kote lavni li pa klè. Pwodiksyon ap bese, epi ekip la ap travay anba gwo tansyon.
Kriz sa a montre yon nesesite ijan pou sipòte CAN ak lòt enstitisyon k ap lite pou sove lavi moun yo. San sipò, plizyè milye moun ka rete san asistans pandan Ayiti ap kontinye plonje nan yon kriz li potko janm viv deja.
Comments