Nan yon desizyon istorik ki ka chanje kou lagè ant Larisi ak Ikrèn, Prezidan ameriken Joe Biden, otorize ikrèn pou sèvi ak misil ATACMS, ki gen kapasite pou frape sib jiska 300 kilomèt. Desizyon sa a, anonse dimanch 17 novanm 2024, make yon chanjman estratejik nan sipò Etazini pou Ikrèn pandan dènye mwa manda Biden nan.
Misil ATACMS yo reprezante yon avantaj taktik pou Ikrèn, paske yo ka frape baz militè ak lòt enstalasyon estratejik Larisi sou teritwa li. Pandan plizyè mwa, Washington te mize sou otorizasyon sa a pou evite agrave konfli a. Sepandan, administrasyon Biden pran desizyon sa a nan yon kontèks kote Larisi te ogmante presyon militè li ak deplwaman plis fòs, enkli 10 000 sòlda nò koreyen.
Desizyon sila vini nan yon moman kote sipò ameriken pou Ikrèn parèt ensèten. Prezidan eli Donald Trump, ki souvan eksprime pozisyon l sou lagè a, ka diminye èd militè a lè li rantre nan pouvwa. Pou Biden, desizyon sa a sanble yon jefò pou ranfòse pozisyon Ikrèn anvan yon tranzisyon politik ki ta ka febli angajman Etazini nan konfli a.
Misil ATACMS yo bay Ikrèn kapasite pou chanje rapò fòs la nan lagè a, men yo soulve tou enkyetid sou posiblite pou konfli a antre nan yon nouvo faz ki pi danjere. Kominote entènasyonal la ap suiv ak anpil atansyon sitiyasyon an, pandan Ikrèn kontinye fè apèl pou jwenn plis sipò pou mete fen nan lagè a an 2025.
Comments