Yon eksplozyon grav rive fèt avèk yon kamyon sitèn nan Miragoâne, samdi 14 septanm 2024 la, aksidan sila a lakoz lanmò 26 moun ak 42 lòt ki gravman blese. Emmanuel Pierre, responsab pwoteksyon sivil nan Miragoâne, te fè konnen viktim yo ap resevwa swen medikal nan diferan lopital nan zòn nan.
Ministè Sante Piblik la, ansanm ak lòt patnè yo, mobilize tout resous ki disponib pou jere kriz la. Kat (4) lopital ap okipe moun ki blese grav, pandan 11 anbilans asire transpò pou jere transfè pasyan yo. Dimanch 15 septanm nan, Médecin Sans Frontières te voye 6 anbilans pou evakye lòt blese yo.
Premye Minis Garry Conille te montre nivo sa enpakte l pandan li te tanmen pran mezi rapid vit pou ede viktim yo. Nan yon mesaj sou X (ansyen Twitter), li te di: « Mwen vrèman regrèt eksplozyon kamyon-sitèn sa a. Mwen ap kolabore ak otorite lokal yo nan Nippes e mobilize ekip pwoteksyon sivil (DGPC), sante piblik (MSPP), ak zafè sosyal pou sove lavi moun ki blese grav yo. Gouvènman an solidè avèk tout viktim yo ak fanmi yo e nou ap òganize evakyasyon pa hélicoptère. »
Premye Minis Garry Conille te vizite lopital Saint Boniface nan Fond-des-Blancs pou sipèvize evakyasyon pasyan yo ak pou sipòte ekip medikal yo. Li te ajoute: « Se avèk anpil emosyon mwen vizite lopital Saint Boniface pou ede evakye moun blese yo. Mwen salye kouraj ak pwofesyonalis ekip medikal la ansanm ak lòt lopital yo ki ap fè tout sa yo kapab pou trete blese yo ak sipòte fanmi yo. Nan moman sa yo, nou tout dwe montre solidarite youn ak lòt ».
Comments