2 polisye kenyen gravman blese : Dout sou kalite ekipman MMSS la.

De (2) polisye kenyen ki deplwaye an Ayiti nan kad Misyon Miltinasyonal Sipò Sekirite a (MMSS), touche  grav pandan yo t ap fè patwouy nan Pòtoprens, kapital peyi a, dapre ajans nouvèl Reuters. Youn nan polisye yo te resevwa yon bal nan tèt malgre li te gen kas, tandiske lòt la te blese nan zòrèy apre yon bal te travèse yon machin blende.

Ensidan sa yo ogmante enkyetid sou bon jan kalite ekipman ki mete an dispozisyon pou fòs entènasyonal la. Daprè plizyè sous, ven (20) machin blende te ret kanpe semèn sa a, paske polisye refize sèvi ak yo, deklare yo kòm defektye. Se dezyèm fwa, dapre temwayaj, yon machin blende pa rive kenbe yon bal.

Dapre Jack Ombaka, pòtpawòl MMSS la, de (2) polisye blese yo evakye nan Repiblik Dominikèn pou resevwa swen. Malgre sa, li asire  misyon an ap kontinye resevwa sipò lojistik epi tout ekipman yo respekte nòmal entènasyonal.

MMSS, ki konte sou finansman ameriken an majorite, mete sou pye pou remanbre sekirite an Ayiti epi fasilite eleksyon pou mete otorite eli yo an plas jiska fevriye 2026. Sepandan, misyon an ap fè fas ak defi k ap vin pi grav, tankou mank kontribisyon lòt peyi yo, enpak gang yo k ap ogmante, epi moral twoup yo ki kòmanse febli.