Jodi 18 novanm nan, raple n respè sakrifis ak kouraj zansèt nou yo, nan Batay Vètyè, etap enpòtan nan yon viktwa ki te make liberasyon Ayiti ak kreyasyon premye nasyon nwa endepandan nan monn nan. Nan tan sa a, malgre divizyon, laperèz ak difikilte, Pèp Ayisyen an te aprann mete tout diferans yo sou kote pou goumen ansanm kont esklavaj ak enjistis.
Batay Vètyè se pa sèlman yon moman nan istwa Pèp sa; li se yon senbòl rezistans pou nou jodi a. Li raple nou dimansyon fòs nou lè nou makonnen ansanm, nan inite, lè nou chwazi lanmou pito olye lògèy, lè nou goumen ansanm pou yon objektif ki pi gran pase nou.
Nan moman sa a kote peyi a ap fè fas ak anpil defi, ann limen ankò menm espri Vètyè a, ann itilize l pou kaba tout eprèv ki vle mete n fas ba douvan tout monn nan. Ann bati yon Ayiti kote inite ranplase divizyon, kote jistis ranplase enjistis, kote espwa ranplase dezespwa. Pa gen okenn pèp ki ka reyisi si li divize, menm jan zansèt nou yo pa t ap ka genyen si yo pa t ini.
Ann fè lapè ak youn ak lòt. Ann sonje fòs nou se nan inite n, lavni Ayiti chita sou zepòl chak grenn ayisyen ki kwè nan chanjman l epi ki pare pou travay ansanm pou fè li rive.
Comments